Un inicio de curso viaxeiro: Arrancou a nosa misión no tempo!
O primeiro día de clase no noso colexio nunca é un día calquera, pero o deste ano foi inesquecible. Os nenos e nenas chegaron coa ilusión habitual de reencontrarse cos seus compañeiros e profesorado, sen imaxinar a sorpresa que os agardaba ao cruzar a porta: os profes recibíronnos vestidos de científicos!
Durante todo o verán, os docentes estiveron traballando secretamente para intentar arranxar unha máquina do tempo que atoparon avariada. Sen embargo, por máis probas e experimentos que fixeron, non foron capaces de solucionalo sós. O único que lograron recuperar das súas investigacións foi unha pequena caixa misteriosa que gardaba no seu interior un audio moi especial.
Xuntos no patio, escoitamos a gravación que nos revelou a nosa gran misión para este novo curso: a máquina do tempo precisa da axuda de todo o colexio para volver funcionar.
Para conseguilo e devolver a orde á historia, ao longo dos vindeiros meses o alumnado terá que superar divertidos retos, resolver enigmas e participar en actividades sobre as distintas etapas históricas. A través desta gran aventura pedagóxica, a aprendizaxe transformarase nunha experiencia viva, motivadora e cooperativa.
Arrancamos esta viaxe coas batas de científicos ben postas, moita enerxía e a certeza de que, traballando en equipo, lograremos superar calquera desafío do pasado, presente ou futuro. Preparados para a aventura?